அதிரையில் குழந்தைகளுக்கு நாளை முதல் போலியோ சொட்டு மருந்து வழங்கப்பட உள்ளது

அதிரை உட்பட‌ தஞ்சை மாவட்டத்தில் 2¼ லட்சம் குழந்தைகளுக்கு போலியோ சொட்டு மருந்து வழங்கப்பட உள்ளது என்று கலெக்டர் சுப்பையன் தெரிவித்தார்.

கூட்டம்

தஞ்சை மாவட்ட கலெக்டர் அலுவலக கூட்ட அரங்கில் போலியோ சொட்டு மருந்து வழங்குவது தொடர்பான ஆலோசனை கூட்டம் நேற்றுகாலை நடந்தது. கூட்டத்திற்கு கலெக்டர் சுப்பையன் தலைமை தாங்கி பேசினார். அப்போது அவர் கூறியதாவது:–

தஞ்சை மாவட்டத்தில் போலியோ நோயை முற்றிலும் ஒழிக்கும் நோக்கத்துடன் 5 வயதிற்குட்பட்ட குழந்தைகளுக்கு தமிழகஅரசு தீவிர போலியோ சொட்டு மருந்து வழங்கும் முகாம்களை ஆண்டிற்கு இரண்டு முறை நடத்தி வருகிறது. அதன்படி இந்த ஆண்டு 19–வது சுற்றின் முதல் கட்டமாக நாளை(ஞாயிற்றுக்கிழமை) நாடு முழுவதும் போலியோ சொட்டு மருந்து வழங்கும் முகாம்கள் நடைபெறவுள்ளது.

தஞ்சை மாவட்டத்தில் 2 லட்சத்து 28 ஆயிரத்து 402 குழந்தைகளுக்கு சொட்டு மருந்து வழங்க திட்டமிடப்பட்டுள்ளது. ஆரம்ப சுகாதார நிலையங்கள், பள்ளிக்கூடங்கள், அரசு மருத்துவமனைகள், தனியார் மருத்துவமனைகள், பஸ் நிலையங்கள், ரெயில் நிலையங்கள், கோவில்கள் மற்றும் பொது மக்கள் கூடும் இடங்கள் என நகர பகுதிகளில் 128 மையங்களும், ஊரக பகுதிகளில் 1,382 மையங்களும் என மொத்தம் 1,510 மையங்கள் மூலம் போலியோ சொட்டு மருந்து வழங்கப்பட உள்ளது.

 daily thandhi